Tað er ymiskt, hvørji skoðsmál, Galaxy, avloysaraskipið hjá Smyrli, hevur fingið - í hvussu so er áðrenn tað fór í sigling.
Men nú tað hevur verið í sigling í fimm dagar, eru tey á Strandferðsluni nøgd við skipið
Eyðvitað hevur veðrið verið gott, men higartil hevur Galaxy hildið ferðaætlanina, sigur Dánjal Samuelsen, leiðari á samferðsludeildini á Strandferðsluni.
Hann sigur eisini, at umborð er ikki nakað at finnast at osg salongirnar eru góðar at sita í.
Annars hava ferðafólk gramt seg um, at tað hevur ikki verið livandi umborð tí tað er so heitt.
Samferðsluleiðarin ásannar, at tað hevur verið ein trupulleiki í teimum aftaru salongunum, men tann trupulleikin er loystur fyri tað mest við tað, at tey gera nógv meiri burtur úr at lufta út.
Galaxy er nakað minni enn Smyril, so hann hevur verið fullur á fleiri túrum.
Samferðsluleiðarin sigur, at tað hevur verið nógvur farmur at flyta, so tað er orsøkin.
Og sum tað sæst á myndini niðan fyri, verða bilarnir, á summum túrum, so væl stúvaðir á biladekkinum, at tað er ikki hugsingur um hjá fólki at fara ímillum teir - og enn minni at sleppa í bilin, ella úr honum.
Tað er grikska manningin, sum er á dekkinum, og Dánjal Samuelsen sigur, at teir eru rættiliga kønir til sítt arbeiði, so har er einki at finnast at.
Teir gera sær eisini ómak at fáa so nógv við sum til ber og táið bilarnir verða settir so tætt, er tað skipað soleiðis, at eingin situr fastur í bilunum uttan at sleppa úr teimum - og tað sama tá ið farið verður í land aftur.
Men Galaxy hevur eisini sínar avmarkingar. Skipið er góðkent til at sigla í eini signifikantari aldu, sum er í mesta lagi fýra metrar.
Signifikanta aldan er ein miðal alduhædd á einum strekki, ella í eina ávísa tíð.
Tvs, at summar aldur kunnu verða væl hægri enn tað, um so er, at aðrar aldur eru lægri enn tað.
Tað hendur seg meiri enn so, eyðvitað mest í ringum veðri um veturin, at tað eru størri aldur á leiðini ímillum Suðuroy enn tað.
Smyril er góðkendur til størri aldur enn tað, ella seks metur, hava vit fingið upplýst.
Eitt, fólk hava funnist at, er, at tað hevur tikið so langa tíð hjá Galaxy at leggja at.
Men samferðsluleiðarin sigur, at tað er munandi betri nú enn seinast, og í Havn hjálpir Pressarin til og á Krambatanga í Suðuroy hjálpir ein sleipibátur hjá Vágs Skipasmiðju, til.
– Skiparin er varin, men heldur t að enn at hann tekur nøkur óráð fyri, sigur samferðsluleiðarin.
Men á Galaxy er biladekkið býtt sundur við skottum, so tað tekur eina løtu at koma í land. Hjá teimum bilunum, sum standa seinast fyri, kann tað taka eitt korter at sleppa í land.
