Eins og undanfarin ár skipar Fuglafjarðar kommuna fyri Earth Hour leygarkvøldið 22. mars frá kl. 20.30 til 21.30, tá øll gøtuljós ljós verða sløkt í Fuglafirði, á Kambsdali og á Hellunum. Fleiri fólk og fyritøkur í Fuglafirði plaga at taka væl undir við tiltakinum, sum kennist friðsælt, savnandi og hugnaligt fyri mong.
Eitt Earth Hour tiltak verður í Fuglafjarðar kirkju leygarkvøldið kl. 20.30, har nýggja gospelkórið Lanterna syngur nýggjar og kendar sangir, meðan kertuljós lýsa kirkjuna upp. Hetta plagar at vera ein sera góð og hugfarslig løta, og í ár er ætlanin at enda við felagssangi.
Kommunan minnir fólk á at ansa sær, um tey ganga ella koyra hendan tíman, tí úti er bølamyrkt, so endurskin eru alneyðug.
Earth Hour er tímin, tá einstaklingar, fyritøkur, kommunur og býir í øllum heiminum seta umhvørvið í miðdepilin. Fleiri kommunur í Føroyum gera eisini tað, og hetta hevur við sær, at stjørnuhavið og norðlýsið síggjast væl, um himmalin annars er klárur. So sløkk ljósið og njót friðin, saman ella hvør sær!
