Í dag koma Dialogar eftir heimspekingin Platon út á føroyskum. Forlagið HEMLIÐ gevur bókina út.

Talan er um fyrstu bók av trimum í eini røð við dialogum eftir Platon.

Dialogar Platons hava havt eina djúptøkna ávirkan á heimspeki og hugsan í Vesturheiminum, og bókmentaliga dygdin setur teir millum fremstu verkini í fornøld, og er óloysiliga knýtt at heimspekiliga virki Platons.

Platon skrivaði ikki heimspekiligar ritgerðir, men dialogar, tvírøður. Sjálvur er Platon ongantíð við í samtaluni, men heldur seg aftanfyri sum rithøvundur. Tað er Sokrates, lærumeistarin hjá Platoni, ið hevur orðið. Í hesi fyrstu bókini eru fýra tvírøður:

• Parmenides

• Theaitetos

• Sofisturin

• Statsmaðurin 

Sokrates og samrøðufelagar hansara skifta orð um eina røð av heimspekiligum økjum í hesum fýra dialogunum.

Tað kann vera torført at fáa skil á, hvat Platon og Sokrates veruliga meina, og hvør ‘heimsspekiligi sannleikin’ í dialogunum er. Júst hetta er ein týðandi kjarni í dialogunum - teir eggja lesaranum til at hugsa sjálvur og umhugsa tað, sum orð verður skift um. 

Hetta er fimm og tjúgunda útgávan hjá forlagnum HEMLIÐ, ið gevur út heimsklassikarar í føroyskari týðing. Eilif Samuelsen týddi.

Heiðursgáva landsins fall Eilifi Samuelsen í lut, tá ið Mentanarvirðislønir landsins 2023 vórðu handaðar. Heiðursgávan er latin týðaranum fyri arbeiðið at flyta klassiskar heimsbókmentir á føroyska tungu.

Bókin er 416 bls og kostar 348 kr. Fyrsta bók í røðini Dialogar fæst til keyps í bókabúðum og á www.hemlid.fo