Christian Matras fyllir 125 ár í dag, og á føðingardegnum hjá hesum mentamanni, sum hevur havt so stóran týdning fyri føroyska málið, hevur Málráðið lagt út eitt áhugavert skriv um hansara lívs- og yrkisleið:

– Fyrstu barnaárini gekk Christian í skúla á Viðareiði. Tá var einki fak, sum æt føroyskt. Alt var danskt. Ein dagin heima við hús kom hann fram á eina bók, sum endavendi øllum. Har á borðinum lá ‘Bíbilsøga’ eftir Jógvan Poulsen (1900). Nú kyknaði okkurt í dreinginum, tí bókin var skrivað á føroyskum. Hetta var fyrstu ferð, at hann las á sínum egna máli. Christian skal seinni hava sagt, at henda bók – ikki innihaldið, men sjálvur málbúnin – var tann týdningarmesta á hansara yrkisleið.

Soleiðis byrjar áhugaverda skrivið á Facebooksíðuni hjá Málráðnum. Les alt skrivið her.

Christian Matras hevur eisini ríkað okkum við hópin av føroyskum orðum sum til dømis gagnnýta, sannkenning og skilmarking.