Annan árfjórðing í ár hevði Bakkafrost 65 milliónir í avlopi. Tað er munandi minni enn í øðrum ársfjórðingi í fjør, tá ið avlopið var 388 milliónir.
Tøkan í Føroyum var 16.020 tons og í Skotlandi var hon 7.034 tons. Í øðrum ársfjórðingi í fjør, vórðu 10.226 tons tikin í Føroyum og 11.366 tons vórðu tikin í Skotlandi.
Í viðmerking til úrslitið sigur Regin Jacobsen, stjóri:
– Fíggjarligu úrslitini í hesum ársfjórðinginum eru ikki nøktandi. Munandi fallið á laksaprísinum, sum stavar frá stórari øking í alheims útboðnum av laksi, viðførdi ógvusliga lækking av inntøkunum.
Samstundis hevur tað stóran týdning, at framleiðslukostnaðurin í Føroyum er lækkaður, og felagið heldur fram at raðfesta tiltøk á hesum øki høgt.
Góða lívfrøðiliga gongdin í Føroyum er tann besta, vit hava sæð. Í sjógvalingini hevur gongdin verið framúr góð, við góðum vøkstri og lægri felli enn vit hava sæð seinastu nógvu árini.
Afturímóti sama ársfjórðing í fjør, er fellið minkað 52 prosent. Í føroysku smoltalingini er framleiðslan ment upp á eitt nýtt og hægri støði. Smoltgóðskan er betrað munandi, og tað hevur stóran týdning fyri, hvussu fiskurin klárar seg, tá hann verður settur á sjógv. Hetta sæst týðiliga aftur við sera lágum felli eftir útseting.
Í Skotlandi eru vit ikki nøgd við gongdina í smoltalingini, har vit tíverri hava havt stórt felli orsakað av sjúku.
Fyri at fáa størsta ágóðan av royndunum úr Føroyum innan framleiðslu av stórum hágóðskusmolti, hava vit nú lagt smoltalingina í Skotlandi saman við teirri føroysku og undir føroyska leiðslu.
Eisini hava vit styrkt leiðsluna á Applecross við royndum starvsfólki úr Føroyum.
Smoltalingin í Skotlandi er framvegis avbjóðandi, men tað gongur betri í sjógvalingini, hóast nakrar einstakar hendingar førdu til hægri felli í ársfjórðinginum.
Góða lívfrøðiliga gongdin í sjógvalingini sum heild førur við sær, at vit hækka okkara væntaða tøku fyri 2025 í Føroyum og Skotlandi.
Fremstu strategisku málini hjá okkum eru óbroytt – at halda fram við at minka um lívfrøðiliga váðan, styrkja raksturin, og tryggja langvarandi virðisskapan.
