Mongu fylgisveinarnir, sum fyritøkan SpaceX hjá Elon Musk hevur sent út í rúmdina, kunnu elva til umhvørvistrupulleikar.

Hetta ávara serfrøðingar um, sambært Berlingske, meðan tøkni íverksetarin hevur fleiri enn 8.000 fylgisveinar hangandi omanfyri okkum. 

Sambært bretska-amerikanska stjørnufrøðinginum Jonathan McDowell er tað møguliga ein stórur trupulleiki, at fylgisveinarnir hvønn dag, detta úr rúmdini og brenna upp í lofthavinum. Í miðal detta tvær niður um dagin.

Tey kemisku evnini, sum fylgisveinarnir eru fyltir við, kunnu møguliga broyta javnvágina í lofthavinum, sigur hann.

Hann er ikki tann einasti við hesum tankum.

- Tað er ein verulig stúran, og tíðin er komin, at fáa umhvørvisligu avleiðingarnar kláraðar. Men fyribils vita vit ikki heilt, hvat hendir, tá øll hesi evnini verða løgd niður í lofthavið, sigur danski stjørnufrøðingurin frá DTU, Michael Linden-Vørnle.

Sokallaðu Starlink fylgisveinarnir hjá Elon Musk, gevur skjótt internet til fjarskotnar partar av heiminum. SpaceX arbeiðir við at senda nógv fleiri.