Kvinnan, sum varð álopin við Sandá á Argjum sunnukvøldið 28. apríl í fjør, var sambært ákæruritinum í lívsvanda.

Sambært politinum og ákæruvaldinum sæst, hvussu álvarsligt álopið hevur verið, nú ákæruritið er skrivað.

Ein 36 ára gamal maður er ákærdur fyri serliga vandamikla neyðtøku við øðrum kynsligum sambandi enn samlegu og roynd til slíkt umframt fyri eitt serliga rátt og harðrent likamsálop.

Sambært ákæruritinum leyp hann á kvinnuna aftanífrá, so at hon datt, og tók strangt kvørkratak, sum gjørdi, at hon ikki fekk andað og var um at missa vitið. Hann sat á búkinum hjá henni — kvinnan var tá við barn í 29. viku.

Harumframt sló hann hana nógvar ferðir hart í høvdið við einum steini ella øðrum líknandi. Hon fekk skaðar í høvdið og á andlitið og kroppin, men megnaði at berjast ímóti, til maðurin rýmdi.

Maðurin noktar seg sekan.

Ákæruvaldið fer at krevja, at hann verður dømdur til forvaring heldur enn fongsul, og at hann, sum er pólskur ríkisborgari, verður vístur av landinum við tað sama.

Tey krevja eisini endurgjald til kvinnuna og vilja, at málið verður viðgjørt sum nevningamál.

Rætturin hevur fingið fyrivarni um at seta av fýra rættardagar, og ætlanin er, at málið verður ført í rætt fyrst í desember.

Maðurin hevur verið í varðhaldi síðan álopið.