Wayne Rooney gevst sum fótbóltsleikari

Fyrrverandi enski landsliðsleikarin hevur avgjørt at enda sína yrkisleið sum fótbóltsleikari. Nú er hann settur sum venjari

Sigurjón Einarsson
15. januar 2021 kl. 14:11

Championship-felagið Derby County váttar á sínari heimasíðu, at felagið hevur sett Wayne Rooney sum nýggjan venjara.

Tann 35-ára gamli liverpoolbúgvin byrjaði kappingarárið sum leikandi hjálparvenjari undir Philip Cocu. Eftir at niðurlendingurin fekk fótin í mittuni av november mánaði, hevur Rooney virkað sum avloysandi venjari. Nú er avtala gjørd við Rooney, ið verður venjari fulla tíð.

Í tíðindaskrivi, sum váttar, at Rooney verður Derby-venjari fram til summarið 2023, kemur eisini fram, at hann samstundis leggur fótbóltsskógvarnar á hillina.