Elin Heðinsdóttir Joensen forkvinna í ÍSF váttar, at tey hava boðað donsku myndugleikunum frá, at tað ikki ber til at taka ímóti donskum pengum at fíggja Oyggjaleikirnar við.

-Tiltakið er fíggjað við pengum frá tí almenna í Føroyum og privatum stuðlum. Tað er avtalan, og tí ber tað ikki til at brúka danskar pengar í tí sambandi, sigur Elin Heðinsdóttir Joensen forkvinna í ÍSF.

Forkvinnan skilir væl, um tað verður undrast á, at tað verður sagt nei takk til pengar, tí tað er altíð tørvur á pengum í ítróttinum.

-Kommunurnar og ÍSF samskifta um umstøður og karmar fyri leikirnar. Feløgini og ymsu greinarnar innan eitt nú frælsan ítrótt hava altíð brúk fyri pengum, men í hesum førinum ber ikki til at veita teimum hesar pengarnar, sum vóru oyramerktir til Oyggjaleikirnar. Tí hava vit boðað frá, at vit ikki hava brúk fyri pengunum, sigur Elin Heðinsdóttir Joensen forkvinna í ÍSF.