Hósdagin 3. Juli skipar Amnesty International Føroyar fyri kravgongu fyri sivila fólkinum í Gasa,
og fyri at heita á føroya landsstýri um at røkja sínar altjóða skyldur um at gera sítt fyri at støðga
fólkadrápinum á palestinar í Gasageiranum. Kravgongan endar á Speaker's Corner, har skráin er
áhugaverd og fjølbroytt. Hanus Kamban og Lív Maria Róadóttir Jæger halda røðu, Elin Brimheim
Heinesen og Kári Sverrisson spæla nøkur løg, og Marjun Syderbø Kjælnes og Elin Brimheim
Heinesen lesa upp yrkingar. Eins og í kravgongunum, sum seinastu tíðina hava verið kring heimin,
verður heitt á fólk um at fara í reytt fyri at draga eina felags linju og vísa, at vit langt síðani eru
farin um reyða markið.
Hvønn einasta dag gerst støðan í Gasageiranum alsamt meira álvarsom og vanlukkulig. Nú ísraelska
aftursvari á Gasa hevur vart í gott 1 ár og 9 mánaðir, er størsti parturin av Gasageiranum lagdur í oyði,
fólk í tíggjutúsundatali eru dripin og enn fleiri liggja undir húsaleivdunum. Neyðhjálp frá óheftum
hjálparfelagsskapum er forðað, landbúnaður og matframleiðsla eru oyðiløgd og børn svølta. Trot er á
reinum vatni, sjúkur herja, heilivágur vantar og sjúkrahús gerast til líkhús.
Greið prógv eru um krígsbrotsverk, brot á humanitera lóg og mannarættindi, brotsgerðir móti
mannarættindi og fólkadráp. Og hóast heimurin hevur fylgt við beinleiðis stroymdu ísraelsku
brotsgerðunum í Gasa í meira enn hálvtannað ár, er Ísrael sloppið at halda fram.
KOLLAPS AV MORALI OG ALTJÓÐALÓG
Vit eru vitni til eitt kollaps av morali og altjóðalóg. Heimsins leiðarar hava svikið palestinar í Gasa -
eisini Føroya politiska leiðsla hevur svikið. Lyftið um, at fólkadráp ongantíð aftur skuldi fara fram, kann
ikki sigast at vera annað enn tóm orð. Millum Føroya politisku leiðarar valdar ein ræðandi tøgn, sum
boðar frá líkasælu um ósek menniskjalív.
At forða fyri teimum ræðuleikum, sum palestinensiska fólkið í Gasa er fyri, er ikki bert ein moralsk
skylda, men er eisini ein skylda sambært altjóðalóg. Vit heita á Føroya Landsstýri um at taka ábygd nú.
Amnesty International Føroyar heitir á Føroya Landsstýri um at virða altjóða lóg, og gera alt fyri at fáa
eina varandi vápnahvíld í lag, so týningin av palestinum fær ein enda, og at øll sivil fólk, sum eru tikin
sum gíslar, verða leyslatin. Vit heita á Føroya landsstýri um alment at fordøma drápinum av ósekum
palestinum í Gasa, og gera sítt fyri at fáa en enda á stongslinum av Gasageiranum og tryggja, at óheft
neðhjálp verður veitt um allan Gasageiran.
HÓSDAGIN FARA VIT Í REYTT
Vit hittast hósdagin 3. juli við Gundadalshøllina kl. 16.30, haðani vit ganga oman á Tinganesi og enda
við Speaker's Corner, har røður, tónleikur og yrkingar bíða fjøldini. Á skránni er
Røður: Hanus Kamban og Lív Maria Róadóttir Jæger
Tónleikur: Elin Brimheim Heinessen og Kári Sverrisson
Yrkingaupplestur: Marjun Syderbø Kjelnæs og Elin Brimheim Heinesen
Vit heita á øll um at fara í okkurt reytt fyri at vísa, at vit draga eina felags linju um, at vit (langtsíðani) eru
komin um reyða markið.
Vit góðtaka ikki rasismu, antisemitismu ella islamofobi.
UM ALLAN HEIM FARA FÓLK Í REYTT
Kring heimin eru kravgongur við sama boðskapi um at “tekna upp reyðu linjuna”. Millum annað
teknaðu Niðurlond eina reyða linju við 100.000 fólkum uttan fyri altjóða dómstólin í Haag 18. Mai í ár.
Eisini savnaðust 15.000 fólk við Christiansborg í Keypmannahavn 18. juni. Øll við sama endamáli at
vísa samhuga við fólkið í Gasa og við boðskapinum um, at støðga fólkadrápinum alt fyri eitt.
AMNESTY FORDØMIR ØLL ÁLOP Á SIVIL
Amnesty International fordømur øll álopi á sivil. Amnesty fordømur álopini á Ísrael 7. oktobur og
gíslatøkurnar, sum eru greið krígsbrotsverk. Amnesty heitur á, at allir gíslar verða leyslatnir treytaleyst
alt fyri eitt. Amnesty vísur á, at gíslarnir ikki verða leyslatnir við at bumba Gasa, men at besti møguleiki
at fáa gíslarnar leyslætnar er við samráðingum undir vápnahvíld.
