Nú klokkan 10 verður tíðindafundur í FSF húsinum. Tá fer Eyðun Klakstein at kunngera, hvørjar 23 hann hevur sent boð eftir at vera við í landsliðshópinum, tá ið landsliðið fer at spæla á heimavølli ímóti Kroatia annan fríggjadag og mánadagin um tvær vikur á útivølli ímóti Gibraltar.
Í gjár var 20. umfar í landskappingini, og í málleysa javnleikinum millum KÍ og HB í Klaksvík, vóru nógvir av teimum, sum ivaleyst vera á listanum hjá landsliðsvenjaranum í morgun.
Merkisvert var tað, at tríggir av teimum, sum síðstu árini hava verið fastir menn á landsliðnum, vórðu skiftir út.
Hallur Hansson hjá KÍ kom ikki á vøllin eftir steðgin. Patrik Johannesen, sum var í landsliðshópinum undan summarsteðginum, var á beinkinum, og hann loysti Hall Hansson av eftir steðgin.
René Shaki Joensen fór av vøllinum, tá ið tað restaðu tíggju minuttir. Hann hevur leingi verið skaðadarvaður og er sjáldan á vøllinum allan dystin á tamb. Í gjár var hann framrættaður í vinstru, inntil Martin Gonzalez loysti hann av. At hann er so skaðadarvaður var orsøkin til, at René ikki var í landsliðshópinum undan summarsteðginum, tá ið Føroyar spældu vinadyst í Georgia, sum vann 1-0, og HM undankappingardyst á heimavølli ímóti Gibratlar, sum Føroyar vunnu 2-1.
René er mest sum hvørja ferð millum teir fyrstu ellivu hjá KÍ, hóast hann ikki venur so nógv, sum liðfelagarnir gera.
Hjá HB fór liðformaðurin Viljormur Davidsen í gjár av vøllinum tríggjar minuttir undan steðginum. Áki Johannesen, sum hevur verið nógv skaðadarvaður og hevur spælt millum lítið og einki, síðani hann í vetur flutti úr B68 og til Havnar, loysti hann av.
Viljormur Davidsen segði soleiðis eftir dystin:
-Tað sær út til, at talan er um slag í skinnabeinið, og tað plagar ikki at vera so leingi, inntil tað er burtur. Vit fáa at síggja, um hetta er soleiðis. Vónandi er tað ikki tað slagi av skaða, sum fyrr í ár var orsøk til, at eg ikki spældi við í fleiri umførum, segði Viljormur Davidsen í samrøðu við FM1 útvarpið.
Áhugin fyri at síggja Kroatia og Luka Modric á Tórsvølli annað fríggjakvøld er stórur. Í gjár segði Brynhild Absalonsen, sum er marknaðar- og samskiftisleiðari hjá FSF, at tað fríggjadagin vóru færri enn 1000 atgongumerki eftir. Tí kann tað væl vera, at tað verður útselt, tá ið Kroatia og Luka Modric fara á Tórsvøll.
