Tórshavnar hevur nú einmælt samtykt at keypa Kondittaríið á Káta Horninum, mitt í Havnini. Gamla Kondittaríið er ein býarmynd tey flestu kenna, og sum heilt nógv hava vitjað gjøgnum tíðina.

Eyðkendi bygningurin er kortini í ringum standi, og ætlanin hevur verið at taka húsið niður.

Men nú hevur Tórshavnar býráð keypt bygningin fyri 5,95 milliónir og sum tað fyrsta fer býráðið at gera neyðugu ábøturnar, so at bygningurin aftur kann vera eitt stað, har fólk savnast.  

Uttan skal hann klæðast og vindeygu skiftast. Hinvegin er ætlanin at varðveita skapið á mønutekjuni - og at varðveita úthurðina, sum eitt ótal av fólki hevur gingið ígjøgnum ímillum ár og dag.

Samstundis er tilbygningurin bygdur út um mark, so hann verður tikin niður.

Hvussu hann verður gjørdur innnan, veldst alt um, hvat endamál hann skal brúkast til.

– Tað hevur stóran týdning fyri okkum, at vit varðveita og hjúkla um søguna, mentanina og dámin í miðbýnum, sigur Elsa Berg, borgarstjóri.

Men hvat bygningurin so skal brúkast til, er ein rættiliga opin spurningur, og í býráðnum vilja tey fegin hava hugskot frá fólki um, hvat tað er best at brúka bygningin til.

Hinvegin hava fleiri býráðslimir eina greiða meining um, hvat bygningurin ikki SKAL brúkast til. Teir vilja nevniliga ikki hoyra talan um, at hann skal vera eitt pitsaria, tí tað halda tey, at tað er nokk av í Havn.

Men samstundis gera tey eisini púra greitt, at bygningurin skal bjóðast út til onkran, sum fer undir eitthvørt virksemi, sum gagnar øllum - og har eru allir møguleikar opnir.

Býráðlimir halda eisini, at talan skal vera um okkurt virksemi sum er opið út á kvøldið.

Fer húsið at standa myrkt og kalt eftir klokkan 17 ella 18 um kvøldið, hevði tað verið syrgiligt, heldur Tróndur Sigurðsson, býráðslimur fyri Kommunulistan.

Hann ávarar kortini um, at bygningurin er í serstakliga ringum standi og hann stúrir fyri, at hann kostar tað dupulta, ella 10-12 milliónir, tá ið hann er klárur at taka í nýtslu.

Heðin Mortensen, býráðslimur fyri Javnaðarflokkin, vísir eisini á, at bygningurin má gerast soleiðis, at eisini rørslutarnað fáa ótarnaða atgongd til hann.

Hann heldur, at bygningurin kann verða brúktur til okkurt endamál til eldri um dagin og kanska til onkur tiltøk til ungdómin um kvøldið.

Men Heðin Mortensen leggur eisini stóran dent at alt uttandura arbeiðið er liðugt á Ólavsøku so at miðbýurin ikki verður eitt byggipláss á tjóðarhátíð okkara - og tað lovaði býráði honum.