Seinast hesi spældu, var fyri tveimum vikum síðani í Klaksvík, tá TB vann 3-1, og í gjár vann TB aftur 3-1, hesaferð í Trongisvági, og við teimum trimum stigunum klintraði TB upp á triðjaplássið, tvey stig frammanfyri Mjølnir og tvey stig aftanfyri Fleyr á øðrumplássi.
TB fekk flúgvandi byrjan og legði seg á odda 6-0 og megnaði fyri tað mesta at halda frástøðuna, men skuldi kortini brúka seks settbóltar fyri at tryggja sær settið 25-22, tí Mjølnir kom afturíaftur ímóti endanum og minkaði um munin úr 17-24 til 22-24.
Góða gongdin hjá Mjølni helt fram í øðrum setti, og eftir at hava lagt seg á odda 5-1 og 10-5 kom settið ongantíð í vanda, og Mjølnir vann sannførandi 25-14.
Síðani skifti gongdin aftur í triðja setti, og TB var omaná, tó ofta bara við einum og tveimum stigum, men eftir 14-13 fór at dragna millum liðini, og TB vann 25-17.
Mjølnir var væl við í fjórða setti og var á odda 9-5, áðrenn TB javnaði til 10-10 og dró frá og vann 25-14.
Støðan í Hotel Djurhuus-deildini:
Nr. | Lið | Dystir | Settmunur | Stig |
1 | SÍ | 5 | 13 | 15 |
2 | Fleyr | 5 | 7 | 11 |
3 | TB | 6 | -1 | 9 |
4 | Mjølnir | 6 | -1 | 7 |
5 | KÍF | 5 | -3 | 6 |
6 | Dráttur | 5 | -15 | 0 |
