Leygardagin varð ein maður førdur fyri Føroya rætt, tí løgreglan vildi hava hann varðhaldsfongslaðan.

Tað hendi efir at løgreglan, fríggjadagin, hevði fingið tvær fráboðanir um innbrot.

Annað innbrotið var í Gamla bókhandli, men har varð einki stolið. Hitt innbrotið var á Hotell Tórshavn og har varð eitt sindur av rúsdrekka stolið, umframt nakað av pengum, men talan var um smáttarí, sigur løgreglan.

Men løgreglan sigur, at tjóvarnir vóru tiknir upp á vakmyndatól, so tað gekst bæði skjótt og væl at eyðmerkja teir - og eisini at fáa fatur á teimum.

Løgreglan sigur, at talan er um ein mann og eina kvinnu. Kvinnan er leyslatin aftur, men maðurin er settur í varðhald. Tað varð hann tí hann er skuldsettur fyri fleiri innbrot og sostatt gjørdi løgreglan av at føra hann fyri rættin við kravi um, at hann varð varðhaldsfongslaður til málini verða kannað.

Og tað var dómarin samdur í og sostatt er maðurin varðhaldsfongslaður í tvær vikur ímeðan løgreglan arbeiðir við at lýsa málini.