Føroysku U19-kvinnurnar eru í hesum døgum til Euro Championship-kapping í Norðumakedonia. Fyrsti dystur teirra var í dag móti Kosovo, sum føroysku kvinnurnar vunnu ein tryggan 34-15 sigur á. Hálvleiksstøðan var 17-2. Hetta upplýsir Hondbóltssamband Føroya.
Kosovo tapti heili 53-14 móti Hollandi í gjár, og tí metir HSF, at talan helst var um veikasta mótstøðuliðið í bólkinum, sum eisini telur Norðurmakedonia, Bosnia Hersegovina og Holland.
Føroyska liðið læt ongan iva vera um, hvat betra liðið var og setti seg á dystin beinanvegin. Hálvleiksstøðan 17-2 vitnar um eina føroyska verju, sum stóð væl saman við málverjanum Rakul Wardum.
- Dysturin var sostatt ongantíð spennandi og fingu venjararnir roynt ymiskar uppstillingar og fingu allar leikararnar í spæl, undan harðaru mótstøðuni, sum er í væntu komandi dagarnar, skrivar HSF.
Føroyar møta Norðurmakedonia í morgin, mánakvøldið kl. 19.30. Dysturin kann stroymast á ehftv.com. Norðurmakedonia vann 39-28 móti Bosnia Hersegovina í gjár.
Besti føroyski leikari í dystinum var kosin Jana Mittún.
Málskjúttar hjá Føroyum vóru hesar:
Jana Mittún 6 mál
Natasja Hammer 5 mál
Lea Símunardóttir Lisberg 4 mál
Hervør Niclasen 3 mál
Brynhild Pálsdóttir 3 mál
Frida Holm Jacobsen 3 mál
Lea Mortensen Mørk 2 mál
Elsa Egholm 2 mál
Rannvá Olsen 2 mál
Lív Bentsdóttir Zachariasen 2 mál
Sára Jacobsen 2 mál