Í gjár og í nátt gjørdi løgreglan ferðmátingar í Eysturoynni og í Eysturoyartunlinum.

Og tað varð dýrt hjá fleiri bilførarum.

Ein bilførari varð tikin á Fuglafjarðarvegnum, har tað er loyvt at koyra 80, men hesin koyrdi 107 kilometrar um tíman og tað gevur honum eitt klipp í koyrikortið, umframt eina bót.

Løgreglan var eisini Millum Fjarða við ferðmátaranum og har er tað eisini loyvt at koyra 80.

Men har vórðu tveir bilførarar tiknir fyri at koyra ávikavist 115 og 120 kilometrar um tíman og tað missa teir koyrikortið fyri. Teir missa tað treytað og tað merkir, at at teir sleppa framhaldandi at koyra, men mugu taka koyrikortið umaftur í næstu framtíð, annars missa teir tað heilt.

Og klokkan eitt í nátt gjørdi løgreglan ferðmátingar í Eysturoyartunlinum og har varð ein bilførari tikin fyri at koyra heilar 125 kilometrar um tíman har tað annars er loyvt at koyra 80. Eisini hesin bilførarin missur koyrikortið treytað.

Umframt at missa koyrikortið treytað, fáa hesir tríggir bilførararnir eisini eina bót upp á 2.000 - 2.500 krónur í part.

Ein annar bilførari setti eisini koyrikortið í vanda tá ið hann ikki helt víkiskylduna á strekkinum ímillum SMS og rundkoyringina á Hálsi. Avleiðingin var, at hann rendi á ein annan bil. Talan var bara um skrokkskaða, men tá ið tað elvir til samanstoyt, táið ein bilførari ikki heldur víkiskylduna, er koyrikortið í stórum vanda.