Í gjár gjørdi løgreglan eitt sindur burtur úr at kanna ferðsluna. Og tað var ikki heilt úrslitaleyst, tí tríggr bilførarar fingu bót, og klipp í koyrikortið.

Í Klaksvík fekk ein bilførari bót og klipp í koyrikortið fyri at tosa í hondhildnari fartelefon ímeðan hann koyrdi.

Og í Havn fingu tveir bilførarar bót fyri at koyra niðan eftir Varðagøtu í gjáramorgunin. Í sambandi við Sankta Frans Skúla og barnagarðin, er Varðagøta einsrættað oman eftir eina løtu rundan um ta tíðina á morgni tá ið skúladagurin byrjar.

Men tað vóru tað tveir bilførarar sum ikki høvdu fingið við í gjáramorgunin og koyrdu niðan eftir.

Annars kannaði løgreglan ferðsluna við skúlar í Havn og í Klaksvík um tað mundi í gjáramorgunin, børnini komu í skúla.

Heilt nógv børn verða koyrd í skúla og løgreglan ansar eftir, at tey brúka ta kravdu trygdarútgerðina og at tey ikki hava skúlatasku á rygginum ímeðan tey sita í bilinum.

Hava tey tað, hava tey onga nakkastúttu, skuldu eitt óhapp hent.

Og løgreglan sigur, at í gjár varð einki mál skrivað, so tað sá alt samalt gott út.