Hetta verður kanska seinasti veturin, har tey, sum skulu til Dals, og úr bygdini aftur, noyðast eftir tí ótespuliga vegnum ígjøgnum bergið.
Ì fleiri ár hava tey arbeitt upp á tunnil til Dals, og hann KANN verða liðugur nú í heyst, sigur Dennis Holm, landsstýrismaður í samferðslumálum.
Sólvit E. Nolsø, løgtingsmaður fyri Framsókn, og dalbingur, hevur fregnast hjá landsstýrismanninum um Dalstunnilin.
Dalstunnilin er 2,2 kilometrar langur, og vegastrekki, sum skulu gerast í tí sambandi, er 300 metrar. Harumframt er ein stórur partur av verandi vegum í Húsavík og í Dali breiðkaðir.
Grót frá tunlinum er eisini brúkt til at umleggja eitt stórt sving á Skálavíkarvegnum.
Í fjør varð arbeitt upp á vegin í tunlinum umframt upp á tunnilsmunnarnar og við at tryggja tunnilin.
Í ár er ætlanin at gera tey arbeiðini liðug, umframt at arbeitt verður við at leggja tekniskar installatiónir í tunnilin og at seta trygdarútgerð og ljós upp - og at asfaltera vegin í tunlinum.
Í løtuni verður arbeitt við at gera eina vegagrøv til dren og til kaðalar. Talan er um kaðalar til telesamskifti, Sev og til tað elektriska í sjálvum tunlinum.
Arbeiðið at tryggja tunnilin, verður gjørt liðugt og í tí sambandi verða 700 metrar av betongi sproytað í tunnilsloftið.
Hetta verður ætlandi gjørt í apríl-mai í ár. Farið er undir at gera tunnilsmunnan Dalsmegin, og síðan verður tunnilsmunnin gjørdur Húsavíkarmegin og tað arbeiðið verður væntandi liðugt í summar.
Somuleiðis skal vegurin asfalterast.
Í næsta mánað verður tvey arbeiðið boðin út, tað eru elarbeiðið, og arbeiðið at seta trygdarútgerðina upp. Og eftir ætlan verður farið undir tey arbeiðini í mai og tey fara at at taka 4-5 mánaðir.
Tilsamans fer Dalstunnilin at kosta 168 milliónir. krónur.
Tunnilin KANN takast í brúk í heyst - men tað er treytað av, at Løgtingið samtykkir eina eykajáttan til arbeiðið nú í vár.
Við árslok vórðu 110 milliónir brúktar upp á tunnilin og nú eru 35 milliónir eftir at brúka í ár. Sostatt er tørvur á eini eykajáttan upp á 23 millónir fyri at gera alt liðugt, sigur Landsstýrismaðurin og vónar, at peningurin kann útvegast so at tunnilin kann takast í brúk í ár.
