Sverri Sandberg Nielsen verður ikki við í OL finaluni í single skollara. Tað er greitt, nú hálvfinalan hevur verið.
Føroyingurin endaði á fjórða plássi, og treytin var at vera millum tríggjar teir fremstu fyri at røkka í finaluna.
Sverri var mest sum alla tíðina á fjórða plássi. Týski Oliever Zeidler legði seg beinanvegin á odda og róði so at siga einsamallur fram ímóti málinum.
Tríggir bátar kappaðust um hini bæði plássini, sum bóru pláss í finaluni við sær. Sverri var leingi á fjórða plássi, og aftanfyri Yauheni Zalaty og grikska bátin. Tá ið tað restaðu knappliga 500 metrar, tók hann Stefanos Ntouskos úr Grikkalandi, sum vann gull á OL leikunum í Tokyo fyri trimum árum síðani.
At Sverri legði seg fram á triðja plássið kløkkaði av álvara grikska røðaran, sum spenti í og fekk nógva ferð á bátin fram ímóti málinum, meðan Sverri ikki tóktist hava nakra orku eftir og endaði á fjórða plássi.
Sverri Sandberg Nielsen hevur sagt, at OL kappingin í París er síðsta kappingin hjá honum á hægsta støði.
Beint aftaná, at róðurin hjá Sverra hevði verið, róðu Sára Maria Johansen og hinar í danska áttaranum. Tær endaðu aftast og skulu harvið ikki kappast aftur.
Síðsti róðurin hjá Sverra Sandberg Nielsen á hægsta stigi verður at kappast í OL B-finaluni.
