Samstundis er hon nývald á Sambandslistanum eftir sítt fyrsta løgtingsval, har hon fekk 368 atkvøður og kom inn sum nummar seks á listanum .
Hon skrivar sjálv á Facebook, at ein rúgva av málum vóru til fyrstu viðgerð, og at hon varð vald í Trivnaðarnevndina, ið skal viðgera broytingar í starvsheitum hjá løgtings- og landstýrisfólkum .
Arbeiðir við broyting av starvsheitum
Málið, sum nevndin skal viðgera, snýr seg um at broyta heitini frá “Løgtingsmaður” og “Landstýrismaður” til felagsheitið “Løgtings- og Landstýrisfólk”. Endamálið er, at heitini eisini kunnu brúkast í kvinnuligari mynd, til dømis Løgtingskvinna og Landstýriskvinna .
Málið varð samtykt í síðstu setu, men fyri at broyta sjálva stýrisskipanarlógina, skal tað samtykkjast av tveimum tingum. Sambært Sunnvá Dahl Høgfeldt er vónin, at talan verður um ein avgreiðsluspurning.
Hon skrivar, at hon er “sera fegin um at vera ein partur av einum so týdningarmiklum máli”, og leggur dent á, at hetta er ein sigur fyri kvinnur í politikki, sum nú kunnu verða viðurkendar sum kvinnur – og ikki sum menn í heitum .
Fyrsta val og skjótur politiskur vøkstur
Sunnvá Dahl Høgfeldt stillaði upp til løgtingsval fyri fyrstu ferð og kom beinleiðis inn í tingið. Tá hon fekk úrslitið, hevði hon sambært Dagur.fo trupult við at fata støðuna.
– Tað er nærum óveruligt, segði hon í sambandi við valúrslitið .
Hon hevur eisini áður gjørt sær politiskar royndir. Í Tórshavnar býráð hevur hon fleiri ferðir tikið sæti sum varafólk fyri Annfinn Brekkstein úr Sambandsflokkinum, tá hann hevur verið burturstaddur .
Hetta er sostatt ikki fyrstu ferð, at hon arbeiðir í politiskum høpi, men løgtingssessurin er eitt týðandi stig víðari í hennara politiska yrkisleið.
Ung rødd í borgarligum politikki
Sunnvá Dahl Høgfeldt er 30 ára gomul og verður mett sum ein nýggj og ung rødd í borgarliga politiska landslagnum. Sambært Dagur.fo verður dentur lagdur á tørvin á fleiri ungum liberalum borgarligum kvinnum í politikki .
Hon hevur áður víst áhuga fyri lokalpolitikki og arbeiðinum í Tórshavnar kommunu, og tað verður mett sannlíkt, at hon eisini framyvir fer at hava ein virknan leiklut í politikki.
