Súni Olsen er nýggjur høvuðsungdómsvenjari í Fuglafirði. Hann avloysir Jóan Paula Jacobsen úr Klaksvík, sum hevur røkt starvið seinastu árini.

-Eg gleði meg til nýggja starvið, sum eg á nýggjárinum fari eldhugaður undir at røkja. Eg ætli mær at vera nógv á vøllinum í Fløtugerði, og uppgávan verður at geva teimum, sum venja børn og ungdómar íblástur og vegleiðing. Hvørji málini vera, fari eg at samskifta við ungdómsnevndina í felagnum um, sigur Súni Olsen.

44 ára gamli Súni Olsen var í síni tíð ein av bestu fótbóltsspælarunum í Føroyum. Hann er gøtumaður og spældi fyri tað mesta við GÍ og Víkingi, og so var hann eisini í B36 og eisini KÍ og B68. Hann royndi seg eisini uttanlands, har hann var í Aalborg og Viborg í Danmark og fyri einum 25 árum síðani í Zwolle í Niðurlondum.

Súni Olsen hevur áður roynt seg sum venjari á Toftum, har hann vandi besta mansliðið, sum var í 1. deild í 2017, og so hevur hann verið venjari hjá kvinnuliðunum hjá B36 og Víkingi.