Tað er ein treyt fyri at fara undir Suðuroyartunnilin, at politisk semja fæst um fleiri onnur mál eisini.
Tað heldur ein stórur meiriluti í Fíggjarnevndini hjá Løgtinginum.
Nú eru tey liðug at viðgera uppskotið um at projektera Suðuroyartunnilin, og at bjóða arbeiðið út.
Bæði Búskaparráðið og Landsbankin hava funnist at ætlanini, tí tey vísa á, at føroyski búskapurin er ikki haldførur og tí er tað ikki ráðiligt at fara undir tunnilin.
Eftir uppskotinum skal landskassin seta 1,35 milliard í tunnilin og tey hava roknað út, at í longdini verður Suðuroyartunnilin ein vinningur fyri samfelagið.
Landsbankin hevur sagt, at tað er skeivt, tí tá ið tað roknistykkið skal gerast, skal útgangsstøðið verða, at eisini 1,35 milliard verður sett í Smyril - og at siglt verður ímillum Suðuroynna og Sand.
Hinvegin vísir meirilutin í Fíggjarnevndini á, at tað er ein politisk raðfesting at seta pening í Suðuroyartunnilin, akkurát sum tað var ein politisk raðfesting at seta pengar í Eysturoyartunnilin og Sandoyartunnilin, umframt Fjøruvegin í Runavík og nýggja ringvegin í Havn.
– Suðuroyartunnilin er størsta verkætlan, sum Føroyar nakrantíð og tí er tað ein sjálvsøgd fortreyt fyri honum, at semja fæst um, hvørji tiltøk skulu setast í verk fyri at fáa búskapin haldføran, sigur meirilutin í Fíggjarnevndini, sum er Fólkaflokkurin, Javnaðarflokkurin, Tjóðveldi, Framsókn og Miðflokkurin.
Her hugsa tey eisini um at tillaga løguætlanina hjá Landinum.
Minnilutin í Fíggjarnevndini, Sambandsflokkurin og Miðflokkurin, halda eisini, at vit hava skyldu til at fáa eina so trygga, góða og bíliga fígging, sum tilber.
– Eitt, sum javnan hevur verið á lofti, er at vit skulu fáa eitt statslán úr Danmark at fíggja Suðuroyartunnilin við.
– Higartil hevur hesin møguleikin ikki fingið serliga positiva umrøðu og minnilutin sigur, at sum tey skilja tað, er ætlanin ikki at troyta hendan møguleikan.
– Hetta undrar stórliga, tí vit eiga at fáa tað bestu fíggingina, sum hugsast kann, sigur minnilutin.
Lánið verður helst nakrar milliardir, og tí hevur rentan sera stóran - og í síðsta enda verður hon kanska eisini avgerandi fyri um verkætlanin verður framd ella ikki, siga Sambandsflokkurin og Miðflokkurin.
– Siga vit, at rentan er 3 prosent ístaðin fyri 4 prosent, verður tað tíggjutals milliónir bíligari um árið - og fleiri hundrað milliónir bíligari tilsamans.
– Vit hava skyldu til at fáa allarbestu fígging, og tí mugu allir møguleikar troytast, siga Sambandsflokkurin og Miðflokkurin.
– Tí slepst ikki undan, at allir hugsandi møguleikar fyri fígging verða kannaðir - eisini møguleikin fyri at fáa eitt statslán frá Danmark, tí alt annað er ábyrgdarleyst, siga tey.
