Fleiri hundrað næmingar eru fluttir burtur, og og fleiri søguligir bygningar hava fingið stórar skaðar, eftir at eldur hevur herjað á Table Mountain í Cape Town í Suðurafrika síðan gjáramorgun.
Eldurin, ið hildið verður kyknaði onkrastaðni á Table Mountain, vaks skjótt og festi í fleiri bygningar á kampusøkinum hjá University of Cape Town, sigur BBC.
Millum annað søguliga Jagger bókasavnið og Mostert’s Mill hava fingið nógvan skaða, men eisini lestrarbústaðir hjá lesandi á universitetinum eru raktir.
Jagger bókasavnið, ið er næstan 200 ára gamalt, hevði nógva týdningarmikið tilfar í varðveitslu, og Mostert’s Mill frá 1796 er – ella var – elsta virkarndi mylla í Suðurafrika.
Sløkkiliðsfólk í Cape Town siga sambært BBC, at eldurin skapaði egnan vind, sum so aftur gjørdi, at eldurin vaks skjótt í turra kjarrvøkstrinum. Roknað verður við, at tað fer at taka í minsta lagi tríggjar dagar bert at fáa tamarhald á eldinum.
South African National Parks, sum, er stovnurin, ið varðar av tjóðarlundum og øðrum økjum í Suðurafrika, heldur, at eldurin er kyknaður, eftir at onkur heimleysur hevur kynt sær bál og er farin frá tí.
Allir næmingarnir eru fluttir burtur frá kampusøkinum, sigur Cape Town University á Twitter, og íbúgvar í økinum hava fingið boð um at lata vindeygu og hurðar aftur, tí nógvur roykur og nógv sót er í luftini.
Í løtuni taka fleiri enn 120 sløkkiliðsfólk lut í átakinum, og fýra tyrlur oysa vatn á eldin úr erva, sigur BBC.
.png){kind=logo}
