Sum vit skrivaðu fyrr í morgun, er kendi portugisiski fótbóltsspælarin, 28 ára gamli Diogo Jota, og yngri beiggi hansara, 26 ára gamli, André, sum eisini var fótbóltsspælari, deyðir í ferðsluvanlukku. André spældi fyri FC Penafiel í næstbestu deildini í Portugal og, teimum flestu kunugt, spældi Diogo Jota fyri Liverpool og portugisiska landsliðið.
Vanlukkan hendi í Spania, á A52 motorvegnum í Cernadilla, sum er beint við markið til Portugal.
Vanlukkan hendi um midnáttarleitið og løgreglan í Spania hevur hevur nú greitt frá, at tey halda seg vita, hví óhappið hendi, skrivar BBC.
Teir báðir brøðurnir komu koyra í einum Lamborghini og kanningarnar hava víst, at bilurin punkteraði ímeðan teir skulu yvirhála ein annan bil.
Av tí sama fór bilurin út av og eldur kom í hann. Sløkkilið og sjúkrabilar vóru á staðnum nakrar fáar minuttir seinni, men teir báðir stóðu ikki til at bjarga.
BBC skrivar eisini at í morgunin eru Liverpool - viðhaldsfólk farin at samlast uttan fyri Anfield, sum er heimavøllurin hjá Liverpool at minnast Diogo Jota við blómum, fløggum og minniskortum.
