Skattatrýstið í Føroyum var 41,9 prosent í fjør. Tað er 1,3 prosent-stig størri enn í 2023.

Tað vísir ein uppgerð hjá Hagstovuni.

Orsøkin til vaksandi skattatrýstið er, at vøksturin í skattainntøkunum hevur verið størri enn búskaparvøksturin.

Almennu inntøkurnar frá skattum og sosialum gjøldum vóru 11,7 milliardir krónur í fjør.

Tað eru slakar 700 milliónir krónur, ella 6,4 prosent meiri enn í 2023. Skattatrýstið er skattir og avgjøld í prosent av bruttotjóðarúrtøkuni.

Vøksturin í bruttotjóðarúrtøkuni var einans 2,9 prosent og tískil vaks skattatrýstið.

Persónligi inntøkuskatturin sum húsarhaldini gjalda, er størsta inntøkukeldan hjá tí almenna. Inntøkurnar frá persónliga inntøkuskattinum vóru góðar 4,7 milliardir í fjør, og tær hava verið støðugt vaksandi síðan 2012.

Á øðrum plássi eru inntøkurnar frá mvg, sum vóru 2,5 milliardir í fjør. Tað 9,9 prosent meiri enn í  2023.

Hesar stóru inntøkukeldurnar vaksa lutfalsliga støðugt frá ári til ár, men aðrar skattainntøkur eru, sum sveiggja nógv. Serliga síggjast stór sveiggj í inntøkunum frá vinnufelagsskatti, kapitalvinningsskatti og tøkugjaldi.

Skattatrýstið hækkaði munandi í 2020, tá koronufarsóttin brast á. Skattatrýstið var tá 43,7 prosent. Síðani er tað minkað á hvørjum ári inntil í fjør, tá ið tað aftur vaks.

Eitt skattatrýst upp á 41,9 prosent er tó lutfalsliga lágt, tí hyggja vit aftureftir, var tað 46 prosent í 1999.

Men so minkaði tað stigvíst eftir fíggjarkreppuna.

 Sammett við hini Norðurlondini, liggja Føroyar á øðrum plássi, tá tað kemur til skattatrýst.

Í Danmark er skattatrýstið 45,4 prosent sum er 3,5 prosent-stig hægri enn í Føroyum. Men so eru heili 11,3 prosent-stig niður til Ísland, sum hevur lægsta skattatrýstið. 

Talvan niðan fyri vísir, hvussu inntøkurnar hava verið av øllum teimum ymsu sløgunum av skatti vit hava