Sjúrður Skaale, afturvaldur fólkatingslimur fyri Javnaðarflokkin, fór í morgun á fund við Mette Frederiksen.

Tíðindafólk spurdu føroyska atkvøðuslúkin hvønn hann peikaði á sum forsætisráðharra.

– Eg peiki á hana. Eg stuðli henni, segði føroyski fólkatingsmaðurin, eins og og hann boðaði frá at hann fór at gera í valdystinum.

Hann vildi tó ikki avdúka nøkur krøv til forsætisráðfrúuna fyri at stuðla eini komandi stjórn.

– Tað fari eg at umrøða við borðið, segði Sjúrður Skaale.

Leikluturin hjá Sjúrði Skaale er ikki líka áhugaverdur, sum eftir seinasta fólkatingsval.

Tá var Sjúrður Skaale tungan á vágskálini, um ein reyð stjórn skuldi skipast, tí tá var minst møguligur reyður meiriluti í Fólkatinginum. Kortini valdi Mette Frederiksen at skipa eina stjórn tvørtur um miðjuna.

Naaja Nathanielsen úr IA og Quarsoq Høeg-Dam úr Naleraq, sum bæði eru nývald grønlendsk fólkatingsumboð, skulu í dag hitta Mette Frederiksen, tí væntað verður, at tey fara at stuðla eini nýggjari danskari stjórn við reyðari leiðslu.

Anna Falkenberg, afturvaldur fólkatingslimur fyri Sambandsflokkin, er í Føroyum í dag, har hon er við í samgongusamráðingunum hjá Sambandsflokkinum saman við Fólkaflokkinum og Javnaðarflokkinum.

Sambært TV 2 News skal hon tó luttaka á netfundi við virkandi forsætisráðfrúuna.

– Ein nýggjur bygnaður má gerast fyri, hvussu vit skipa okkum sum trý lond í einum ríki, annars fer tað ikki at halda. Tað verður mín greiði boðskapur, sigur Anna Falkenberg við TV 2 News