Sissal Jóhanna Norðberg yvirraskaði 9 ára gomlu Nellie, sum saman við mammu síni var farin í sendinga Go' morgen Danmark at fortelja um tvíburðasystur sína Floru, sum fekk heilakrabba í 2021 og tíverri ikki gjørdist frísk aftur.
Hon andaðist einans seks ára gomul.
TV 2 hevur hesa vikuna Knæk Cancer-viku, har ið fokus er á at savna pening inn til krabbameinsgransking.
Samstundis vilja tey skapa upplivingar fyri tey, sum hava havt krabbamein – og eisini fyri tey avvarðandi.
Okkurt vakurt kom tó úr myrkrinum – nevniliga eitt lag, sum Nellie hevði yrkt til systur sína.
Nellie greiddi frá, at Floru dámdi ógvuliga væl firvaldar. Teir skuldu tí sjálvsagt vera við í lagnum, sum var spældur í kirkjuni til jarðarferðina, tá familjan skuldi siga Floru farvæl.
Mánamorgunin yvirraskaði Sissal so Nellie, tá ið hon sang lagið í Go' morgen Danmark á TV 2. Nellie varð tikin á bóli.
