Í morgin fer B36 til Klaksvíkar at spæla á útivølli fyri síðstu ferð í ár. Tá ið dysturin í Klaksvík verður av, vera tveir dystir eftir hjá B36, og báðir vera í Gundadali. Tann fyrri verður leygardagin um eina viku, tá ið Skála verður gestur í 27. og síðsta umfari í landskappingini, og so verður tað um tvær vikur, at B36 fer at spæla steypafinalu á Tórsvølli ímóti grannunum í HB.
Um tað í morgin verður, sum tað hevur verið nógvu tær undanfarnu ferðirnar, so fer Silas Eyðsteinsson at verja B36 málið í Klaksvík.
Dysturin verður serligur fyri 26 ára gamla B36 málverjan. Bæði tí hann, sambært FaroeSoccer, fer at verja málið í bestu deildini fyri 100. ferð, og tí Silas Eyðsteinsson og B36 í dag hava skrivað undir uppá, at málverjin verður á lønarlistanum hjá B36 fram til kappingarlok í 2026.
Fram til og við 2019 umboðaði Silas Eyðsteinsson barndómsfelagið 07 Vestur. Í 2020 var hann í AB, í 2021 og 2022 var hann aftur í 07 Vestur, í 2023 var hann í B36 og spældi eisini tveir dystir fyri TB og tveir fyri EB/Streym, og so hevur hann í ár verið í B36.
Fyrra partin av árinum var Silas Eyðsteinsson fyri tað mesta eykamálverji, meðan Bjarti Mørk vardi málið í bestu deildini. Síðani Magne Hoseth tók við sum B36 venjari, hevur Silas Eyðsteinsson verið málverji í bestu deildini.
