Nú klokkan 20 var tíðindafundur í NSÍ hølunum í Runavik. Har boðaði NSÍ formaðurin Karstin Joensen frá, at nýggur NSÍ venjari er Sigurdur Ragnar Eyjólfsson, sum er 52 ára gamal íslendingur.

Hann hevur UEFA-pro útbúgving, og í bestu íslendsku deildini hevur hann verið venjari hjá ÍBV í 2014 og hjá Keflavík frá 2021 til 2023. Eisini hevur hann verið hjálparvenjari í norska Lillestrøm, og so hevur hann verið landsliðsvenjari í kvinnufótbólti í bæði Íslandi og Kina.

-Hetta kennist vera spennandi og áhugaverd uppgáva at fara undir. Eg havi sæð nógvar dystir hjá NSÍ, og tað er skjótt at staðfesta, at felagið eigur nógvar góðar spælarar. Málið hjá felagnum er at vera við í toppinum, og nú fara vit at tosa um, hvussu vit fáa sum mest burturúr spælarunum, sum eru í felagnum. Tað hevur stóran týdning fyri felagið, at teir, sum eru aldir í felagnum, fáa møguleika at spæla seg inn á liðið, og tað virði eg. Men um vit skulu vera við í toppinum, so verður kanska neyðugt at fáa styrk aðra staðni frá, staðfestir Sigurdur Ragnar Eyjólfsson, Siggi, í samrøðu við dimma.fo