Eftir góða sigurin á Fleyr fyri 10 døgum síðani hevði KÍF góðar vónir um eisini at standa seg ímóti oddaliðnum SÍ, men mátti skjótt ásanna, at ávísur munur er á styrkini teirra millum, sum nú er.

SÍ var longu frammanfyri 12-7 í fyrsta setti, tá SÍ vann seks bóltar á rað og gjørdi tað til 18-7, og so gjørdist talan um rættiligan avsmurning í settinum, sum SÍ vann 25-14.

Í øðrum setti hepnaðist heldur betur hjá KÍF, sum fylgdi við til 12-12, áðrenn tað fór at dragna millum liðini, og SÍ vann settið 25-20.

Sama gongd var í triðja setti, tá SÍ við fimm stigum á rað fór frá 8-8 til 13-8. KÍF fekk tó nakað av spenningi í aftur, tá munurin minkaði niður í tvey stig við støðurnar 18-20, 20-22 og 22-24, men tá KÍF ikki fekk bilbugt við lobbinum frá Henrikku Wang Jacobsen eydnaðist SÍ at vinna 25-22.

Í morgin kl. 14 spæla Mjølnir og TB í Klaksvík og kl. 18 Fleyr og Dráttur í Havn.