Tað er eingin loyna, at sethúsaprísurin í Havn er rættiliga spolaður uppeftir hesi seinastu árini.

Og tað ger hann framvegis og í fjør fór miðal sethúsaprísurin í Havn upp um fýra milliónir. Tað er fyrstu ferð, at tað hendur og í fjør kostaði eini sethús í Havn yvir 4,1 millión í miðal, ella heilt nágreiniliga 4.155.633 krónur í miðal.    

Her er bara talan um sethús og ikki um íbúðir og um hús, sum, har grundstykkið er minni enn 250 ferðmetrar.

Annars er prísurin hækkaður alsamt síðani 2012, men frá 2022 til 2023, lækkaði prísurin úr 3,9 milliónum niður í 3,8 milliónir. Orsøkin er, at tá hækkaði rentan - men síðani er hon lækkað aftur, og tað fekk so prísirnir at hækka aftur til tað, teir eru nú.

Annars er miðal prísurin fyri alt landið eisini hækkaður og við árslok kostaði eini sethús í Føroyum, 2.272.897,10 krónur.

Tað merkir, at tað er rættiliga stórur munur á sethúsaprísinum í Havn og á bygd.

Í størri bygdum kostaði eini sethús í miðal, 2,2 milliónir við árslok og á smábygd kostaðu tey góðar 2,1 millión, ella eitt sindur meiri enn helvtina av tí, eini hús kosta í Havn.

Men tølini vísa eisini, at sum heild, at bara hesi seinastu 10 árini er sethúsaprísurin hækkaður næstan tvífaldaður  

Samstundis vísa tølini eisini, at tað verða ikki serliga nógv sethús keypt og seld.

Hesi seinastu 10 árini er fólkatalið vaksið fleiri túsund fólk. Men í fjør vórðu bara 282 sethús keypt og seld í Føroyum og tað er tað lægsta talið hesi seinastu 10 árini. í 2013 vórðu 251 sethús keypt og seld, og so hækkaði talið sum heild. Tað árið, flest sethús vórðu keypt og seld, var í  2020 tá ið 376 sethús vórðu keypt og seld - men síðani er talið alsamt lækka til 282, sum tað var í fjør.