Sethúsaprísirnir hækka framvegis - og teir hækka nógv. Tað staðfestir Betri Banki í eini nýggjari uppgerð.

Betri Banki sigur, at bara fyrsta ársfjórðing í ár eru sethúsaprísirnir níggju prosent hægri enn miðalprísurin var í fjør.

Sostatt er miðalprísurin á sethúsum nú komin upp á tríggjar milliónir krónur.

Í Havn vóru prísirnir í fyrsta ársfjórðingi í ár, seks prosent hægri enn miðalprísurin var í fjør.

Tað vil siga, at miðalprísurin fyri eini sethús í Tórshavn er 4,4 milliónir krónur. 

Seinastu 10 árini er miðalprísurin fyri sethús í Tórshavn tvífaldaður. Frá at vera góðar 2,1 milliónir krónur í 2015 táttar hann nú, sum nevnt, í 4,4 milliónir krónur.

Taka vit alt landið undir einum, eru sethúsaprísirnir tvífaldaðir frá góðum 1,4 milliónum krónum til góðar 3 milliónir krónur.

Talvan vísir gongdina hesi seinastu árini

Og tað er eingin glotti fyri framman.

– Vit síggja eingi tekin um, at prísurin lækkar í næstum, sigur Kára á Dunga, stjóri í Betri Heimi, sum selur hús fyri fólk.

Í stuttum kann sigast, at útboðið er nógv minni enn eftirspurningurin. Stutt sagt er støðan tann, at tað tað er trot á bústøðum av øllum sløgum. øllum støddum, og øllum príslegum.

Hon sigur, at tað er eisini ein veruleiki, at samferðslumøguleikarnir hava ein stóran leiklut tá ið fólk taka avgerð um, hvar tey vilja búseta seg.

– Tað sóu vit, tá ið Vágatunnilin kom og tá ið Eysturoyartunnilin kom, og vit síggja tað aftur nú, Sandoyartunnilin er komin, sigur Kára á Dunga.