Tveir málningar hjá Maiken Anitu Højgaard eru stolnir úr sethúsunum hjá henni á Toftum. Málningarnir stóðu á einum skápi í gongini, men eru nú horvnir. Harumframt er ein tungur og stórur figurur eisini vekk – hann stóð í havanum.
Figururin var gjørdur av einum útlendskum listafólki, sum hevði tilknýti til Saltangará, og tað varð bara gjørt eitt eintak av honum. Maiken sigur seg, hava sæð figurin í sølubólkinum, Rótikassin á Facebook, men finnur nú ikki uppslagið aftur.
Stuldur í kommununi vekir varhuga
Ein anonymur borgari skrivaði nýliga í Facebook-bólkinum Túnatos – Nes kommuna, har fólk vórðu biðin um at boða frá, um tey høvdu merkt til stuldur í økinum. Skrivað varð, at pengar vóru stolnir úr húsum hjá fólki í kommununi.
Eisini greiddi ein kvinna frá í einari samrøðu við Maiken, í einum matvøruhandli á Toftum, fyri umleið tveimum vikum síðani, at onkur hevði stolið 500 litrar av olju um náttina. Eftir fráboðan, komu fólk frá Effo at kanna tangan og staðfestu, at stór olju-nøgd var tikin.
Maiken sigur, at hon sá málningarnar í sølubólkinum, Rótikassin á Facebook, men kendi teir ikki aftur, sum sínar beinanvegin, tí hon hevði ikki varnast við, at hennara vóru vekk.
Í dag hevur Anita boðað politinum í Klaksvík frá málinum. Hon heitir nú á øll, sum hava sæð hesar málningar ella figurin – serliga í Rótikassanum ella líknandi sølubólkum – um at seta seg í samband við hana ella boða frá hjá løgregluni.
