Vaktar- og bjargingarskipið, Tjaldrið, er nú 49 ára gamal, og hann hevur tænt fyri seg. Og nú verður ferð sett á arbeiðið at útvega eitt nýtt skip fyri hann.
Tað fortaldi Jóhan Christiansen, landsstýrismaður í fiskivinnumálum, fyri Løgtinginum í dag.
Hesi seinastu 20 árini hevur Vørn víst á tørvin at fáa eitt nýtt skip fyri Tjaldrið. Men tað hevur ongantíð eydnast hóast fleiri samgongur hava arbeitt við ymsum loysnum, heilt frá at keypa eitt brúkt skip ella at leiga eitt skip, og til at byggja nýtt skip fyri Tjaldrið.
Tey flestu eru samd um, at tað er ein átrokandi tørvur á einum nýggjum skipi fyri Tjaldið, sigur landsstýrismaðurin.
Her hugsar hann um eitt skip sum kann røkja bæði vaktar- og bjargingartænastur og brúkast í tilbúgving og oljubasing.
Ein sterk tilbúgving við tveimum skipum er ein týðandi liður í at kunna røkja altjóða
eftirlitsskyldur, og at kunna veita neyðstøddum hjálp á stóra havøkinum kring Føroyar, sigur Jóhan Christiansen.
Hann minnir Løgtingið á, at broytta heimspolitiska støðan, og alsamt veksandi skipaferðslan í Norðuratlantshavi, merkja harumframt, at tørvur er á at menna eina munagóða oljutilbúgving, og at førleikarnir at vera við í tiltøkum til frama fyri verju og trygd í okkara parti av Norðuratlantshavi, verða styrktir.
Har kunnu føroyingar taka lut við sivilum skipum í flotavenjingum hjá NATO.
– Arbeitt verður áhaldandi við ætlanini um at fáa eitt skip ístaðin fyri Tjaldrið, og tað er neyðugt, at hetta arbeiðið nú av álvara kemur ígongd, sigur Jóhan Christiansen. Hann leggur afturat, at tað er eisini endamálið hjá Landsstýrinum.
Hann sigur, at tað er hansara vón, at ein ítøkilig loysn kann leggjast fyri Løgtingið næsta ár, sigur hann.
