Í gjár hendi eitt rættiliga sermerkt ferðsluóhapp í Sandoyartunlinum.

Tað var seinnapartin í gjár, at óhappið hendi, og tað hendi tá ið ein lastbilur koyrdi ígjøgnum tunnilin.

Inni í tunlinum misti lastbilurin brádliga tvey hjól av bakakslinum. Tey stóru hjólini fóru rullandi eftir vegnum við nógvari ferð, og tað eina rakti ein persónbil, sum eisini var í tunlinum. Persónblurin fór í knús. Bilførarin var einsamallur í bilinum, men fekk ongan skaða.

Í sambandi við óhappið var tunnilin stongdur í hálvan annan tíma, til alt varð tikið upp aftur.

Løgreglan kannar nú, hvussu tað kundi bera til, at hjólini loysnaðu. Tey siga, at tað er einki, sum bendir á herverk, ella at tey eru loyst við vilja. Men kannast skal eftir um hjólini eru skift og um tey eru eftirspent og so víðari.