- Hvat er týdningarmiklari? Kappingarførið hjá einari vinnu sum tjenar ríkiligt av pengum, ella møguleikin hjá ungum familjum at fáa eitt heim, sum tey hava ráð til, og sum tey kunnu kenna seg trygg í?
Soleiðis spurdi Hans Jacob Thomsen, tingmaður fyri Javnaðarflokkurin, tá hann hevði orðið, nú uppskot er lagt fyri tingið um at gera lestrarbústaðir á Eirargarði. Røðan kann lesast her.
Hetta er eitt gott uppskot, tí vit fáa upp til 55 lestraríbúðir bíliga og skjótt, og tær liggja beint við lestrarstaðið.
So man skal leita longi og vera kreativur, um man skal finna argument ímóti hesum uppskotinum.
Men, tað ger Fólkaflokkurin.
Fólkaflokkurin tosar um, at tað er gott við lívi í býnum. So kanska vit bara skulu gera, sum Fólkaflokkurin vil, og lata vera við at gera slík átøk, so verður í øllum førum nokk av lívi í Steinatúni.
Fólkaflokkurin tosar eisini um, hvat tað ger við kappingarførið á privata húsamarknaðinum.
Hvat er týdningarmiklari? Kappingarførið hjá einari vinnu sum tjenar ríkiligt av pengum, ella møguleikin hjá ungum familjum at fáa eitt heim, sum tey hava ráð til, og sum tey kunnu kenna seg trygg í?
Vit kunnu eisini venda spurninginum við.
Hvat ger vaksandi rakstraravkastið í vinnuni við møguleikan hjá føroyingum at fáa eitt heim? Við gongdini seinastu árini sær tað mest út til, at vaksandi rakstraravkastið mest er komið av hækkaðum prísum.
Hvat bagir?
Fólkaflokkurin hevur eisini sett spurnartekin við, um tað er gott, at 42 ung fáa ein bíligan bústað, tí hvat við øllum teimum, sum ikki sleppa inn í Eirargarð?
Fyrst og fremst er talan um upp til 55 íbúðareindir, t.v.s. at tað kann væl verða, at fleiri fólk sleppa inn har, tí ung hava tað við at finna saman og ofta eisini fáa børn.
Men eisini hesin spurningurin kann vendast við.
Í dag skriva miðlarnir t.d., at húsaprísirnir sambært Betri Banka eru hækkaðir 9% í fyrsta ársfjórðingi í ár í mun til miðal í fjør.
Er tað rætt, at vit, sum eiga hús, skulu hava tvísiffraða øking í okkara húsavirði, tí at neyðin er so stór? Er tað rætt, at ung skulu seta seg botnleysa skuld fyri at fáa eitt heim, meðan summi kunnu stinga mió í lumman. Enntá skattafrítt.
Samgongan bøtir um bústaðartrotið
Vøksturin í húsaprísunum kemur ikki burturúr ongum. Tað eru menniskju, sum eru noydd at gjalda henda prísin. Oftast ungir føroyingar, ið bara vilja seta búgv og skapa eitt heim til familjuna.
Hendan samgongan roynir at bøta um bústaðartrotið, meðan Fólkaflokkurin av øllum alvi stríðist ímóti.
Vit hava givið Bústaðir heimild til at læna meira, so tey kunnu byggja meira.
Vit hava álagt teimum, at tey skulu byggja minni og bíligari, soleiðis at fólk hava ráð at leiga.
Vit hava givið kommunum heimild til at gera alment gagnliga bústaðarbygging.
Vit hava givið kommunum heimild til at áleggja bústaðarskyldu á nýbygging.
Og nú hava vit eitt uppskot um, hvussu vit skjótt kunnu gera Eirargarð 2 til leigubústaðir fyri ung lesandi.
Trupulleikin er stórur og trupul, fyri ikki at siga ómøguligur, at loysa uppá stutta tíð, men uppskotini, eg nevndi, saman við hesum uppskotinum um Eirargarð, fara at gera mun.
Hans Jacob Thomsen
