Samgongan hevði varðveitt meirlutan í tinginum, um vit høvdu havt løgtingsval í dag.
Tað vísir ein veljarakanning, sum spyr.fo hevur gjørt fyri Dimmalætting.
Men meirilutin er tódnaður, síðan løgtingsvalið í fjør. Sam gongan fær eftir hesi kanningini 50,8 prosent av atkvøðunum og 17 tinglimir, meðan andstøðan fær 47,3 prosent og 16 tinglimir.
Fyri samgonguna er tað ein afturgongd á 0,9 prosent, meðan andstøðan hevur eina framgongd á 1,8 prosent.
Tað eru Javnaðarflokkurin, Tjóðveldi og Framsókn, sum manna landsstýrið. Av teimum er tað bert minsti flokkurin í samgonguni, Framsókn, sum hevur eina framgongd, meðan teir báðir størru flokkarnir ganga aftur.
Javnaðarflokkurin minkar úr 26,6 prosentum, sum hann fekk á valinum seinast, til 25,5 prosent.
Tjóðveldi fer úr 17,7 pro sentum niður í 16,9 prosent í kanningini hjá spyr.fo.
Framsókn fer úr 7,5 prosent um niður í 8,5 prosent. Allir tríggir samgonguflokkarnir varðveita tingmannatalið uttan Javnaðarflokkurin, sum missir ein av sínum níggju tingsessum.
Andstøðan
Stóri vinnarin í nýggjastu veljarakanningini er Fólkaflokkurin, sum gongur heili trý prosent fram – úr 18,9 prosent um uppí 21,9 prosentstig. Tað gevur flokkinum ein tinglim afturat, so flokkurin hevði fingið sjey tinglimir í staðin fyri seks, sum flokkurin hevur nú.
Fyri Sambandsflokkin gongur tað skeiva vegin eftir hesi kanningini. Flokkurin gongur aftur ikki nógv, men úr 20 prosentum niður í 19,5 prosent, um val var í dag.
Miðflokkurin minkar eisini úr 6,6 prosentum niður í 5,8 prosent.
Tað er vert at leggja til merkis, at Sjálvstýri, sum ikki rakk upp um tinggáttina, tá ið løgtingsval var seinast, hevur eina framgongd á 1,9 og fær 2,7 prosent av atkvøðunum. Hetta er kortini ikki nóg mikið til at fáa umboðan á tingi.
Stóru málini
Gitingar kunnu altíð gerast um, hví flokkar ganga fram, og aðrir ganga aftur.
Hendan samgongan hevur fleiri stór mál at loysa, men neyvan er nakað at ivast í, at viðurskiftini við Russland fylla nógv millum veljararnar.
Tiltøkini móti Russlandi, fiskivinnuavtalan og annars, hvussu Føroyar skulu fyrihalda seg á alheims politiska pallinum, nú kríggj er í Evropa, fyllir sjálvandi nógv.
Ein spurnarkanning um viðurskiftini gevur ábendingar um, at tað helst ikki er heilt samsvar millum tann politikk, sum samgongan ynskir at reka á hesum øki og tað, sum veljararnir halda.
Júst tað sama er helst eisini orsøkin til framgongdina hjá Fólkaflokkinum.
Í veruleikanum er tað heldur ikki fyrr enn nú, at hendan samgongan sleppur at seta síni fingramerkir á gongdina í sam felagnum. Samgongan gjørdi eina fíggjarlóg fyri í ár, men av tí, at samgongan ikki varð skipað fyrr enn stutt fyri jól, so byggir fíggjarlógin í ár fyri stóran part á tað, sum undan farna samgonga hevði stungið út í kortið.
Nú skal hendan samgongan bæði uppfylla vallyftir og tryggja langtíðar haldføri í búskapinum. Tað skal gerast samstundis, sum samgongan skal uppfylla vallyftir um styttri arbeiðsviku, lønarlyft til bólkar av løntakarum, sum í stóran mun taka sær av umsorganararbeiði, umframt at samgongan hevur lovað skattalækkingar fyri ávísar bólkar.
Nógv bendir á, at leiðslan í samgonguni skal vísa sera gott politiskt handalag, tá ið tað í heyst av álvara verður farið undir at boksast um fíggjarlóg ina fyri komandi ár.
