Sølan av nýggjum Tesla bilum í Danmark var meira enn helvtina í fyrsta ársfjórðingi í mun til sama tíðarskeið í 2024.

Tað vísa tøl frá Mobilitet Danmark.

Fyrstu tríggjar mánaðirnar av árinum, vórðu 1.549 nýggir Tesla-bilar skrásettir í hesum landi samanborið viðð 3.556 av hesum slagnum í fjør.

Tað svarar til eitt fall á góð 56 prosent.

Fallið merkir, at Tesla var nummar tíggju á listanum yvir bilmerkir í Danmark, sum høvdu selt flest bilar teir fyrstu tríggjar mánaðirnar av árinum.

Fyrsta ársfjórðing í fjør var amerikanski elbilaframleiðarin nummar tvey á tí listanum.

Samstundis sæst, at fleiri onnur merki hava havt halavind frá ársbyrjan. Hetta er galdandi fyri millum annað Volkswagen, Hyundai, Cupra og Skoda.

Ilyas Dogru, sum er brúkarabúskaparfrøðingur hjá danska áhugafelagnum hjá bilførarum, metir, at tað kunnu vera fleiri viðurskifti, sum hava fingið danskar brúkarar at venda Tesla bakið.

Hetta kemst millum annað av, at fleiri av modellunum hjá fyritøkuni eldast. Tí hava nógv bíðað eftir einari dagføring av vælumtókta Model Y, sum kemur á marknaðin í hesum døgum.

- Fyri tað næsta kemst afturgongdin eisini av, at stór kapping er á elbilamarknaðinum, har kappingarneytarnir hava steðgað upp við nýggjum modellum, príslækkingum og betri garantitreytum, metir búskaparfrøðingurin.

- So hevur Tesla ikki longur marknaðin til sín sjálvs.

Harumframt hevur eisini verið ein neilig "Elon Musk effekt", metir Ilyas Dogru, og vísir til stjóran í Tesla, sum er sprongdur út á politiska pallin sum ein av størstu stuðlunum hjá amerikanska forsetanum, Donald Trump.

- Vit hava fingið rættiliga nógvar fyrispurningar í okkara ráðgeving, har fólk siga, at tey vilja hava ráðgeving um at keypa ein elbil - tað skal bara ikki at vera ein Tesla.