Hátíðarhald var á Rannsóknarstovuni mikudagin, tá nýggja rørpostskipanin á Landssjúkrahúsinum var víst fram.

Við nýggju rørpostskipanini verða blóðroyndir skjótari greinaðar, og harvið fær sjúklingurin skjótari svar. Higartil tók tað áleið ein tíma at samla allar royndirnar, sum síðani skuldu greinast. Við nýggju skipanini eru fyrstu svarini longu klár, og farin út á deildirnar, áðrenn tímin er runnin.

Rørskipanin er knýtt til skaðastovuna og allar seingjardeildir, og gjøgnum hana ferðast blóðroyndirnar gjøgnum rør, sum verða stýrd við lufttrýsti.

Til hátíðarhaldið hildu Gunnvá Guttesen, varastjóri, Ann E. Østerø, depilsleiðari á Diagnostiska depli, Birita K. Samuelsen, leiðandi bioanalytikari, og Jan Rasmussen, depilsleiðari á Medisinska depli, røður.

Kringvarpið gevur gjørt eitt innslag, sum sæst her: https://kvf.fo/netvarp/sv/2025/11/21/blodroyndirrorpostur