Í Víkingi hava tey orsøk til at fegnast um lutakastið til síðsta umfari undan deildarspælinum í Conference League, meðan tey í KÍ staðfesta, at tað verður neyðugt við enn einum mest sum óhugsandi avriki og úrsliti, um tað skal eydnast klaksvíkingum at vinna seg í enn eitt deildarspæl í Europa.

Fyrsta takið hjá Víkingi er hóskvøldið á Tórsvølli og annað hóskvøld í Belfast at vinna seg víðari ímóti norðurírska Linfield FC. Um tað eydnast, so bar lutakastið í dag við sær, at næsta mótstøðuliðið verður Rijeka úr Kroatia ella Shelbourne úr Írlandi.

Mótstøðuliðið hjá Víkingi – um tað eydnast at vinna ímóti Linfield FC – verður taparin atv uppgerðini millum Rijeka og Sjelbourne. Rijeka verður roknað at vera favorittur, og tí verður tað ivaleyst írska liðið, sum verður mótstøðuliðið hjá Víkingi.

Um tað eydnast KÍ í annaðkvøld og hóskvøldið í næstu viku samantalt at vinna ímóti Neman Grodno úr Hvítarusslandi, so bíðar sponsk mótstøða. Lutakastið í dag lagaði tað soleiðis, at KÍ so fer at spæla ímóti Ray Vallecano úr Spania. Hetta er ikki eitt av kendastu liðunum í Spania, men eingin ivi er um, at talan verður ivaleysa stór og at spanska liðið verður stórfavorittur. Spanska kappingin verður roknað at vera tann næstbesta í Europa, og Ray Vallecano endaði síðsta kappingarár á áttanda plássi.