Ein høgravendur aktivistur hevur seinastu mánaðirnir fingið nógvar yvirskriftir í týsku bløðunum.

Hettar eftir at hava skift kyn, og síðani fingið loyvi at sita sína fongsulsrevsing í einum kvinnufongsli.

Málið snýr seg um týskaran Sven Liebich, sum í nítiárunum var limur í nýnazistiska felagsskapinum Blood & Honor.

Soleiðis sá nýnazisturin Sven Liebich út, tá hann varð dømdur eitt hálvt ár í fongsul í 2023. Mynd: Heiko Rebsch/dpa/AP Myndir

Hann hevur fyrr elvt til øsing, við millum annað at sagt at tvørkynd eru "sníkar".

Men nú hevur Liebich, sum varð dømdur eitt hálvt ár í fongsul í juli 2023 fyri ærumeiðing og haturstalu, offisielt broytt kynssamleika sín, frá at vera maður til at vera kvinna.

Hann hevur eisini fingið sær navnið Marla-Svenja Liebich. Fleiri týskir miðlar, eitt nú Der Spiegel og Bild, siga frá hesum.

Týskir miðlar hava sett spurnartekin við, um kynsskiftið hjá Liebich er álvarsamt, ella bara ein provokatión sum er ætlað at avbjóða skipanina.

Liebich hevur nevniliga í áravís verið kendur fyri síni høgravendu sjónarmið og hevur eisini áður gjørt queerfobiskar útsagnir," skrivar Der Spiegel.

Ein nýggj lóg í Týsklandi ger tað lættari at registrera nýtt kyn og navn.

Lógin loyvir einstaklingum at broyta skrásetta kyn og fornavn gjøgnum umsókn til myndugleikarnar, í staðin fyri at skula fáa loyvi ígjøgnum rættin,sum áður hevur verið.

-Nú kanst tú broyta kyn við bert trimum klikkum á músina.

-Lógin er ikki hóskandi í verandi líki og ikki nóg væl umhugsað. Tí at áseta títt kyn er ikki eitt spæl, sigur týski advokaturin og professarin í almennum rætti, Volker Boehme-Neßler, við blaðið Bild.

Lóggávan í Týsklandi viðvíkjandi kynsskifti hevur sveiggjað frá einum ekstremi til hin, sigur hann at enda.