Eitt tað fyrst uppskotið, nýggja samgongan legði fyri Løgtingið eftir at hon er skipað, var at avtaka mvg á bensini og diesel til 31. juli.

Men tá skal støða takast til um tað skal halda fram, tí lógin fer úr gildi á nýggjárinum.

Orsøkin til uppskotið er prísurin á bensini og diesel er nógv hækkaður eftir at USA og Ísrael lupu á Iran og Hormussundið varð avbyrgt.

– Brádligi prísvøksturin ger, at tey, ið koyra nógv, hava færri pengar til aðra nýtslu og fáa illa lagt um til aðra orku beinanvegin, sigur Aksel V. Johannesen, landsstýrismaður í fíggjarmálum, sum hevur lagt uppskotið fyri Løgtingið

Hann sigur, at tí er politiskur vilji til at lætta um, so at broddurin verður tikin av ógvusligu hækkingini í prísinum á brennievni til flutning.

Við verandi prísum merkir tað, at prísurin á bensini og diesel til privatbrúkarar kann lækka umleið 2,50 krónur fyri liturin.

Tað merkir, at tað fer at verða ein hundraðkrónuseðil bíligari at fylla sær tangan, alt eftir, hvussu nógv hann tekur.

Og endamálið er, at príslækkingin verður sett í verk alt fyri eitt lógin er lýst og mett verður, at hetta fer at kosta landskassanjm 20 milliónir í mistum inntøkum.

Men landsstýrismaðurin leggur afturat, at landið longu hevur fingið hægri inntøkur frá mvg vegna hækkandi oljuprísir.