Skjótt fara føroyskir bilførarar at sleppa frá at hava koyrikortið í lummanum tá ið teir koyra bil í Danmark - og danskir bilførarar sleppa frá tí, tá ið teir koyra í Føroyum.

Landsstýrið og danska stjórnin eru nevniliga samd um at góðkenna talgilda koyrikortið hjá hvørjum øðrum, so nú verður tað nokk at hava tað á telefonini.

Hendan avtalan er úrslitið av fundi ímillum danska ráðharran í flutningsmálum, Thomas Danielsen, og landsstýrismannin í samferðslumálum, Jóhan Christiansen.

Men tað verður kortini ikki heilt enn. Fyrst skulu reglurnar broytast formliga, men so skjótt reglurnar eru broyttar, verða talgildu koyrikortini góðkend í báðum londunum.

Teir báðir politikararnir eru samdir um, at hetta fer at gera tað lættari hjá nógvum. Og Jóhan Christiansen vónar, at hetta er fyrsta stigið til, at tað føroyska, talgilda koyrikortið, eisini verður góðkent í fleiri ES londum.