Valkvøldið var Jóhan Christiansen nummar seks á listanum hjá Tjóðveldi, sum fekk seks vald í nýggja løgtingið. Tað vóru tríggjar atkvøður aftur til Eirik í Jákupsstovu, sum var nummar sjey og harvið fyrsti eykalimur hjá Tjóðveldinum.
Í dag hevur fínteljing verið, og nú tað er liðugt talt, so vísir tað seg, at Eirikur í Jákupsstovu er nummar seks og Jóhan Christiansen nummar sjey.
- So er fínteljingin av og eg endaði á 7 plássið. So nú eri eg fyrsti varalimur. Ynski Eiriki í Jákupsstovu hjartaliga til lukku við sessinum. Og øll tit, sum stuðlaðu mær og Tjóðveldi, skulu hava eina hjartans tøkk, skrivar Jóhan Christiansen á facebook vanga sínum.
Tá ið vit ringja til Jóhan Christiansen, greiðir hann frá, at hann í kvøld er uppringdur av valnevndini, sum boðaði honum frá, at hann ikki er valdur.
-Sjálvandi eri eg vónbrotin, men tá ið tað er fíntalt og úrslitið vísir seg at vera soleiðis, so mugu vit taka tað til eftirtektar, sigur Jóhan Christiansen.
Í fínteljingini vísti tað seg, at seks atkvøður hjá Eiriki í Jákupsstovu í Gøtu vóru lagdar til Dennis Holm, sum onga atkvøðu fekk í Gøtu. Tí hevur Eirik í Jákupsstovu í fínteljingini fingið seks atkvøður aftrat og hevur 313 persónligar atkvøður, meðan Jóhan Christiansen hevur 309 persónligar atkvøður.
-Eg eri kløkkur og eisini fegin um, at eg nú eri tingmaður, og samstundis harmist eg vinmanninum í Leirvík, sum var óførur í valstríðnum. Honum ynski eg alt tað besta, og sjálvur fari eg at leggja nógv fyri í arbeiðnum fyri at arbeiða fyri okkara land og einar frælsar Føroyar, sigur Eirikur í Jákupsstovu í samrøðu við dimma.fo.
