Í nátt hava nógv jólaborðhald verið, og løgreglan sigur eisini, at tað hevur verið nógv av fullum fólki í býnum.

Men sum heild hevur tað verið friðarligt og tað hevur verið lutfalsliga lítið hjá løgregluni at gera.

Eitt, sum leyp í eyguni á løgreglufólkunum er, at nógv ungfólk hava verið í býnum  - men ikki ung undir 18 ár kortini. Og nógv av teimum hava verið so drukkin, at tað hevur verið neyðugt hjá løgregluni at hjálpa teimum á føtur og til hús.

Í nátt hava tvey fólk fingið 1.500 krónur í bót fyri at bróta skilhaldsreglurnar. Annað fólki fekk bótina fyri at rætta løgreglufólki longutong og hitt fekk bótina fyri at hava skumpast við onnur fólk.

Mitt í nátt steðgaði løgreglan einum bili, og tá ið bilførarin varð biðin um at blása í alkometrið, sló tað út, so hann er skuldsettur fyri rúsdrekkakoyring og blóðroynd er tikin av honum.

Og í nátt varð eisini ein maður tikin fyri at hava hótt onnur, ikki við vápni, men munnliga.

Løgreglan sigur, at maðurin varð handtikin og settur í brummuna. Talan er um ein útlending og seinni í dag verður hann førdur fyri rættin.