Benjamin Netanyahu, forsetisráðharri Ísraels, segði fyrr í dag, at hann hevur givið boð um at byrja friðarsamráðingar við Libanon.

-Tí Libanon fleiri ferðir hevur endurtikið at tey vilja lata upp fyri beinleiðis samráðingar við Ísrael, gav eg í gjár stjórnuni boð um at byrja beinleiðis samráðingar við ⁠Libanon skjótast gjørligt, sigur Netanyahu sambært Reuters.

Hesar samráðingarnar fara at snúgva seg um at avvápna Hizbollah, og at fáa friðarlig viðurskifti millum Ísrael og Libanon.

Libanesiska stjórnin hevur í skrivandi løtu, ikki svarað uppá útsagnirnar hjá Netanyahu.

Ein tíma áðrenn forsetin segði hettar, segði libanesiski forsetin Joseph Aoun, at einasta loysnin á støðuni í Libanon, er at fáa vápnahvíld millum tey bæði londuni.

Hann segði seg arbeiða við einum diplomatiskum slóði um hettar málið, sum verður sæð sum positivt av altjóða aktørum.