Tað hevur regnað illa seinastu dagarnar - og í gjár fór ein bilur út av í regninum.

Óhappið hendi Undir Gøtueiði, har ein bilur kom koyrandi, men so misti førarin tamarhaldið á honum og hann gleið út av.

Løgreglan sigur, at eingin fólkaskaði var, og bilurin fekk heldur ikki stóran skaða.

Løgreglan heldur, at orsøkin til óhappið var, at vegurin var so vátur í regninum, at bilurin misti sambandið við vegin og gleið út av. Hetta er tað, sum á fakmáli verður kallað aquaplaning.

Løgreglan sigur, at rúsdrekka var ikki uppi í og bilurin hevði góð dekk.

Annars sigur løgreglan at ein bilførari varð tikin í Kollafjørði í gjár fyri at koyra ov skjótt.

Har er loyvt at koyra 80, men hesin varð tikin fyri at koyra 107, og tað var førarin bæði bót og klipp fyri.