Ongi úrslit

Minningarorð um Sonna Smith

Hann var sera nærlagdur í sínum arbeiði og sendingarnar vóru væl umtóktar, sigur Jóhann Mortensen, journalistur, í minningarorðinum

Sonne Smith arbeiddi í Útvarpi Føroya í fleiri ár
Jóhann Mortensen
31. mars kl. 21:15

Í gjár bórust tíðindini um, at tíðindamaðurin Sonne Smith var farin. Sonni var í fleiri ár tíðindaleiðari í Útvarpi Føroya. Sonne Smith var í mong ár ein kend rødd í Útvarpi Føroya - sum tíðindamaður og sum programmeðarbeiðari. Sonne Smith byrjaði starvsleiðina í útvarpinum í 1960-unum, tá hann legði til rættis sendingar við tónleiki til føroyska ungdómin. Sonne Smith var sera nærlagdur í sínum arbeiði og sendingarnar vóru væl umtóktar.

Hann hevði útbúgving innan handil og fígging, men arbeiðið í útvarpinum fekk hann at saðla um, og í 1976 leyk hann prógv sum journalistur frá Journalistskúlanum í Århus. Sum nýútbúgvin tíðindamaður fekk Sonne Smith starv í útvarpinum og skrivaði fyrst og fremst tíðindi uttan úr heimi, sum hann læs upp við síni góðu útvarpsrødd. Hann hevði stóran áhuga fyri tí, sum hendi á altjóða pallinum, og dugdi væl at seta hendingar og rák í eitt størri perspektiv.

Mong minnast óivað sendingarnar, sum hann gjørdi saman við Hans Holm um viðurskifti í øðrum londum - um landafrøðilig viðurskifti og fólkasløg.

Í 1989 varð Sonne Smith settur í starv sum tíðindaleiðari. Eitt starv, sum hann hevði til í 1995. Um aldarskifti gavst Sonne Smith í útvarpinum og skrivaði eftir tað greinar fyri bløð og tíðarrit. Hann hevði stóran alsk til føroyska málið, og eitt skifti vegleiddi hann tíðindafólk í útvarpinum í málsligum ivamálum. Á almannamiðlum hevur hann støðugt vegleitt lesarar um góðan føroyskan málburð.

Seinastu árini hevur Sonne Smith búð á Tvøroyri, har hann eisini vaks upp. Hann kendi seg heima á Tvøroyri, og har gjørdist hann ein bygdamynd. Hann var virkin í ymiskum, eitt nú í felagnum Naddoddi.

Sonne Smith andaðist í heiminum á Tvøroyri ígjár, 78 ára gamal.

Mest lisið hesa vikuna

Tú mást ikki sláa í hel?

30. mars kl. 23:53

HB spælari noktaði at taka í hondina á Annu Falkenberg

22 tímar síðan

Brandur fekk ikki nóg skjóta hjálp og fimm síður um dansibandskongin í Vági

28. mars kl. 14:20

Starlink vil veita internet í Føroyum - stovnaðu føroyskt smápartafelag

20 tímar síðan

Trump kemur til Føroya

31. mars kl. 23:59

Viðmerking til grein á dimma.fo

18 tímar síðan