Tað er ikki hvør dag, at ein sær ein shetlandspony við vognbaki rulla gjøgnum Sørvágs bygd. Men tað er júst tað, sum Malena og systir hennara hava fingið stóran gleði burturúr – og nógv onnur eisini.
- Eg í miðjuni og systir mín, sum situr longst til høgru, dáma væl at fáast við ross og fara túrar saman, greiðir Malena frá. Vinkonan hjá systur míni, sum situr longst til vinstru, dámar eisini væl, og er tí ofta við eisini.
Rossið, ið ber tær gjøgnum bygdina, eitur Tekla og er ein 6 ára gamal shetlandspony, sum báðar systurnar eiga.
-Eg keypti hestavognin úr Danmark og havi ikki prøvað at koyrt við hestavogni fyrr, so tað tók mær eina løtu at finna útav, sigur Malena.
Men síðan tá, hava tær verið nakrar túrar saman. Hon er tó sera ovfarin yvir, hvussu væl tað riggar, og hvussu røsk Tekla er. Malena hevur sjálv lært seg á netinum, hvussu man brúkar hestavogn.
Túrar við hestavogni vekja nógv ans í bygdini, og fólk eru skjót at fáa telefonina fram.
-Tað er altíð stuttligt at fara við hestavogni. Tað er sjálvandi nógv fólk, sum hyggja, og fleiri taka eisini myndir, tá man kemur frammvið, men tey flestu spyrja ikki um loyvi at taka mynd – Beinta er ein av teimun fáu, sum spurdi. Eg leggi ikki so nógv í tað longur, men tað er ikki so stuttligt at koma á ávæntaðar myndir, sigur Malena
Hon heldur tó, at flest fólk fáa nakað gott burturúr sjónini.
- Eg haldi bara, at øll sum hyggja, fáa eitt smíl á andlitið – so tað er bara gott.
Malena er longu kend í bygdini fyri at ganga við heldur óvanligum djórum:
-Eg átti eisini eina ær, sum eg plagdi at ganga túr við – so tað var uppaftur løgnari at síggja ein pony og eina ær ganga túr saman,” sigur hon smílandi
Men Malena hevur ein dreym:
-Tað burdi verið betri umstøður at havt ross í Sørvági. Tað eru so nógvir ríðitúrar, sum eru góðir her vestri, og nógv fólk dáma væl at fáast við ross – men plássi er ikki endiliga til tað, sigur hon.
-Mín dreymur er, at vera við til at betra um umstøðurnar og skapa eitt rossaumhvørvi, har fleiri kunnu hava rossið hjá sær standandi – so vit kunnu síggja fleiri ross í bygdini, sigur Malena
