Í gjár var løgreglan á rundferð norðan fyri, har tey kannaðu ferðsluna. Og í tí sambandi vórðu fleiri bilførarar tiknir fyri at koyra ov skjótt, og nakrir av teimum fingu eisini klipp í koyrikortið.

Á Strondum fingu tríggir bilførarar klipp í koyrikortið fyri at koyra góðar 70 kilometrar um tíman har tað annars bara er loyvi at koyra 50.

Umframt klippið, fáa bilførararnir eisini einar 2.500 krónur í bót.

Í Runavík fekk førarin á einum lastbili eisini klipp í koyrikortið fyri at koyra 68 á einum strekki í bygdum øki, har tað bara er loyvt at koyra 50.

Umframt klippið, fær førarin eisini 3.000 krónur í bót.

Tað eru strangari reglur fyri lastbilar enn fyri persónbilar. Ein lastbilur skal bara koyra 16 kilometrar skjótari enn loyvt er, so fær førarin klipp, men ein persónbilur skal koyra 21 kilometrar skjótari enn loyvt er.

Umframt hesir fýra bilførararnir, sum fingu klipp í koyrikortið, vóru tað eisini fleiri aðrir, sum fingu bót.

Í nátt varð ein bilførari tikin fyri at koyra við kenning í Klaksvík. Og tá ið løgreglan steðgaði einum bili í Havn, hevði ta eina fólki í bilinum eina lítla nøgd av hassji uppi á sær, so tað verður viðkomandi skuldsettur fyri.